Sawhthing quintals nuai 3 chuang lei

by News Editor

Tualchhung News

ZORAM TODAY| 3rd November 2025: Vawiin hian Mizoram Agricultural Marketing Board te chu an Chairman Chief Minister Lalduhoma kaihhruaiin CM Conference Hall-ah an thukhawm a. Kumina thlai thar leite thlirletna an nei.

Meeting-ah hian kuminah Sawhthing quintals 3,38,354 lei a nih thu tarlan a ni a, a man pek chhuah tawh hi Rs. 118. 89 Cr. niin la pek chhuah loh Rs. 20 Cr. vel a la awm.

Sorkarin sawhthing a lei zingah LPK Trip 7 chiah hralh ral lohvin a awm a. Hetianga a awm chhan hi a chhe tur ven nana thliar (grading) a ngaih vang a ni. Hei pawh hi leitha siam nana lei diltu an awm mek. A dang zawng chu mumal taka tihral vek a ni, tih an tarlang.

Sawhthing lei leh hralh thua thil fel lo a awm leh awm loh chhuitu Investigation Team ten Champhai district an chhuichianna report an pe a. Thil dik lo an hmuhchhuahte hi sawrkarin a taka sum a la pekchhuah loh te an ni. Hetiang harsatna hi a awm tawh loh nan ruahmanna siam a ni.

Kumin sawhthing lei leh hralhna bikah hian Central Sorkar Market Intervention Scheme atangin Rs. 9 Cr. vel hmuhlet beisei a nih thu an tarlang.

Meeting-ah hian PC Vanlalruata, Agriculture Minister, C. Lalsawivunga, Horticulture Minister, Lalthansanga, LRS &WC Minister, Dr. KC Lalmalsawmzauva, Adviser to CM (Handholding) leh member te an tel a ni.